Rusiyanın baş naziri Vladimir Putin təsdiq edib ki, bir neçə həftə əvvəl ABŞ xüsusi xidmət orqanları tərəfindən tutulan, lakin sonradan amerikalı agentlərlə dəyişdirilən rusiyalı casuslarla görüşüb. Baş nazir jurnalistlərin suallarına cavab olaraq bildirib ki, casuslarla görüşdə “Vətən haradan başlayır” mahnısını da oxuyublar. O, söhbətin vətənpərvərlik haqda getdiyini deyib. Putin təsdiq edib ki, həbs olunduqdan sonra Qərb mətbuatının ulduzuna çevrilən Anna Çapman da bu görüşdə iştirak edib.
Xatırladaq ki, ABŞ Federal Təhlükəsizlik Xidməti Rusiyanın xeyrinə casusluq fəaliyyəti ilə məşğul olan 12 nəfəri yaxalayıb. İki ölkə arasında “soyuq müharibə”nin başa çatmasından sonra ən iri casus qalmaqalı yaranıb, lakin tərəflər qalmaqalın böyüməsinə imkan vermədən öz aralarında casus mübadiləsi həyata keçiriblər. ABŞ-da həbs edilən rusiyalı casuslar Moskvaya gətirilib və Xarici Kəşfiyyat Xidmətinin qərargahında bir müddət saxlanılıblar.
Rusiya mətbuatı yazır ki, Putin həmin casuslara yaxşı vəzifələr verməyə hazırlaşır. Gözlənilir ki, onlar iri investisiya, tikinti və sığorta şirkətlərində icraçı direktor postlarını tutacaqlar. Məlumatlara görə, ifşa edilən agentlərə yeni adlar və pasportlar veriləcək. Bildirilir ki, özəl sektora aid şirkətlər keçmiş kəşfiyyatçılarla işləməkdə maraqlıdır. Çünki onların vasitəsilə hakimiyyət orqanları ilə əlaqələr yarada bilirlər.
MUSAVAT